Sida ay sheegayaan warbixino ka imaanaya Ingiriiska Memphis Depay ayaa u muuqda mid 25 Malyan Oo Pound ugu biiraya kooxda ka dhisan garoonka Old Trafford.
21-jirkaan reer Holland ee haatan ka tirsan kooxda PSV Eindhoven waxaa si ba’an loola xiriirinayaa kooxda Man United, balse sidoo kale Liverpool ayaa dhinac ka dooneysa, sidoo kalana macalinka kooxda PSV Phillip Cocu ayaa ka dhawaajiyay in xidigaan uu bixi doono.
Dhanka kale saxaafada Ingiriiska ayaa daliil ka dhiganeysa xiriirka wanaagsan ee ka dhaxeeya Louis Van Gaal iyo Memphis Depay madama macalinka United ee haatan uu ahaa shaqsigii ugu horeeyay ee xulka uga wacay tartanka caalami ah madama uu Koobkii Aduunka u waday.
Si kastaba Memphis Depay ayaa haatan kooxdiisa kula guuleysan raba koobka horyaalka Holland waxeyna kaliya kaga xiran tahay iney hal guul gaarto.
Ugu dambeyntii Depay oo 2011 kasoo muuqday PSV ayaa diyaar u ah inuu hormariyo xirfadiisa isla markaana uu ka hoos ciyaaro LVG.
