Sabtiga nagu soo fool leh magaalada Berlin ayaa indhaha caalamka lagu wada jeedin doonaa madaama Finalaha Champion-ka ay isku haleeli doonaan kooxaha Barcelona iyo Juventus.
Hadaba kulankan wuxuu qaas u noqon doonaa labada macalin ee xili cayaareedkan dadaalka dheeriga ah sameeyeen Luis Enrique iyo Massimiliano Allegri.
Macalin Massimiliano Allegri hadii uu kooxdiisa Juventus koobka Yurub u qaado waxay u noqon doontaa shaqsi ahaantiisa markii ugu horeesay ee uu koobkan gacanta ku dhigo.
Sidoo kalena Allegri ayaa noqon doono tababarihii 8-aad ee reer Talyaani ah kaasi oo koobka horyaalada Yurub ku guuleesto wuxuuna ku biiri doonaa liiska macalimiinta reer Talyaani ee tartankan qiimaha badan qaadeen sida:
Nereo Rocco (AC Milan 1963 & 1969)
Giovanni Trapattoni (Juventus 1985)
Arrigo Sacchi (AC Milan 1989 & 1990)
Fabio Capello (AC Milan 1994)
Marcello Lippi (Juventus 1996)
Carlo Ancelotti (AC Milan 2003 & 2007, Real Madrid CF 2014)
Roberto Di Matteo (Chelsea FC 2012)
Dhanka kale tababare Luis Enrique isagana waxay u noqon doontaa markii ugu horeesay shaqsi ahaantiisa ee uu koobkan ku guuleesto hadii Barcelona Finalaha Champion-ka habeenka sabtiga ah badiso.
Sidoo kale Luis Enrique wuxuu noqon doonaa hadii uu Champion-ka qaado macalinkii 6-aad ee reer Spain ah kaasi oo ku guuleesto tartankan qiimaha badan.
Waxaana horey koobkan u qaadeen macalimiinta reer Spain ee kala ah:
José Villalonga (Real Madrid CF 1956 & 1957)
Miguel Muñoz (Real Madrid FC 1960 & 1966)
Vicente del Bosque (Real Madrid FC 2000 & 2002)
Rafael Benítez (Liverpool FC 2005)
Josep Guardiola (FC Barcelona 2009 & 2011)
