Daafaca Liverpool Martin Skrtel ayaa heshiis cusub qalinka ugu duugi doona kooxdiisa todobaadka soo aadan isagoo saxiixi doona heshiis sadex sano ah.
Daafacaan goor hore ayuu ogolaaday inuu heshiiska u kordhiyo kooxda, waxaana la dhameyn doonaa marka uu xidigaan dib ugu soo laabto tababarka ay kooxda isugu diyaarineyso kulamada fasaxa oo ku beegan todobaadka soo aadan.
Skrtel wuxuu ku jiraa 12-kii bilood ee ugu dambeeyay qandaraaska uu haatan kula jiro kooxda Liverpool, waxaana bilowgii sanadkaan ay kooxda usoo bandhigtay heshiis aan u cuntamin oo qalqal galiyay mustaqbalkiisa garoonka Anfield Road.
Martin Skrtel wuxuu Liverpool kusoo biiray sanadii 2008 isagoo markaas kaga yimid kooxda Ruushka ka dhisan ee Zenit St Petersburg.
Todoba sano oo uu ku sugnaa kooxda Liverpool wuxuu saftay 293-kulan, wuxuuna ka mid yahay haatan xidigaha ugu muhiimsan kooxda uu hogaamiyo Rodgers.
