Ac Milan ayaa ku warantay iney dalka Colombia u direyso dhaqtarka gaarka ah ee kooxda iyo agaasimaha ciyaaraha si ay usoo dhameeyaan saxiixa Carlos Bacca.
La Gazzetta dello Sport ayaa qortay in kooxaha Milan iyo Sevilla ay shalayto dhameystireen wax walba oo ku saabsan arinta xidigaan ee suuqa kala iibsiga waxaana la sugayaa kaliya in la dhameystiro saxiixiisa.
Dhaqtarka kooxda Stefano Mazzoni iyo agaasimaha ciyaaraha ee kooxda Rocco Maiorino ayaa lagu waramay iney u duulayaan maanta Colombia si ay ula kulmaan xidiga.
Wargeysyada ayaa aaminsan in Stefano Mazzoni uu soo ogaan doono xaalada caafimaad ee 28-jirkaan reer Colombia, halka Maiorino uu isna goob joog ka noqon doono halka heshiiska uu xidigaan ku saxiixayo.
Dhanka kale waxaa lagu soo waramayaa in Carlos Bacca uu heshiis afar sano ah saxiixi doono isagoo sanadii qaadan doona 3.5 Malyan Oo Euro, La Gazzetta dello Sport ayaana aaminsan in Milan ay saxiixiisa ku dhawaaqi doonto xidigaan maanta galinka dambe.
